മലപ്പുറം: സമൂഹ മാധ്യമങ്ങളില്‍ ശ്രദ്ധനേടിയ കുട്ടി മോട്ടിവേഷന്‍ സ്പീക്കര്‍ മലപ്പുറം കൊണ്ടോട്ടി കിഴിശ്ശേരി സ്വദേശിയായ നാലാം ക്ലാസുകാരന്‍ മുഹമ്മദ് ഫായിസിന്റെ വീഡിയോയിലെ വൈറല്‍ വാക്കുകള്‍ പരസ്യത്തിന് ഉപയോഗിച്ചതിന് മില്‍മ റോയല്‍റ്റി തുക കൈമാറി.
ഇന്ന് ഫായിസിന്റെ വീട്ടിലെത്തിയ മില്‍മ അധികൃതര്‍ 10,000 രൂപയും, ആന്‍ഡ്രോയിഡ് ടിവിയും മില്‍മ ഉല്‍പന്നങ്ങളും ഫായിസിന് റോയല്‍റ്റിയായി നല്‍കി. ഇന്നലെ സാമൂഹിക മാധ്യമങ്ങളില്‍ ഫായിസിന് റോയല്‍റ്റി തുക നല്‍കണമെന്ന് ആവശ്യപ്പെട്ട് ക്യാംപെയിന്‍ നടന്നതിന് പിന്നാലെയായാണ് അധികൃതര്‍ വീട്ടിലെത്തിയത്.
‘ചെലോല്‍ത് ശരിയാവും ചെലോല്‍ത് ശരിയാവൂല്ല! പക്ഷേങ്കി ചായ എല്ലാര്‍തും ശരിയാവും പാല്‍ മില്‍മ ആണെങ്കില്‍!’; എന്നതായിരുന്നു മില്‍മ ഉപയോഗിച്ച പരസ്യ വാചകം. ഫായിസിന്റെ വീഡിയോ വലിയ രീതിയില്‍തന്നെ സോഷ്യല്‍ മീഡിയയില്‍ ശ്രദ്ധിക്കപ്പെട്ടിരുന്നു. കുട്ടി മോട്ടിവേഷന്‍ സ്പീക്കര്‍ എന്ന രീതിയിലാണ് ഫായിസിന്റെ വാക്കുകളെ എല്ലാവരും ഏറ്റെടുത്തത്.
അതേസമയം മാതൃകാ പരമായിട്ടാണ് ഈ റോയല്‍റ്റി തുക ഫായിസിന്റെ കുടുംബം ഉപയോഗിച്ചത്. മുഖ്യമന്ത്രിയുടെ ദുരിതാശ്വാസ നിധിയിലേക്കും, ഒരു പാവപ്പെട്ട പെണ്‍കുട്ടിയുടെ വിവാഹത്തിനുമായി തുക വീതിച്ച് നല്‍കാനാണ് ഫായിസിന്റെ കുടുംബം തീരുമാനിച്ചത്.
