കൊല്‍ക്കാത്ത: ബംഗാളില്‍ ബി.ജെ.പിക്ക് കനത്ത തിരിച്ചടി നല്‍കി ആയിരത്തിലധികം പേര്‍ പാര്‍ട്ടി വിട്ടു. സംസ്ഥാനത്ത് വേരുറപ്പിക്കാനുള്ള ശ്രമങ്ങള്‍ നടത്തിവരവെയാണ് ബി.ജെ.പി, ഫോര്‍വേഡ് ബ്ലോക്ക് നേതാക്കളും പ്രവര്‍ത്തകരും പാര്‍ട്ടിവിട്ട് തൃണമൂല്‍ കോണ്‍ഗ്രസില്‍ ചേര്‍ന്നത്.
ബൂത്ത് അടിസ്ഥാനത്തില്‍ തൃണമൂല്‍ കോണ്‍ഗ്രസ് നടത്തിയ രക്തസാക്ഷി ദിനാചരണത്തിന്റെ ഭാഗമായാണ് മറ്റു പാര്‍ട്ടികളില്‍ നിന്നുള്ള നേതാക്കളും പ്രവര്‍ത്തകരും തൃണമൂലിലേക്ക് ചേക്കേറിയത്. ബി.ജെ.പി, കോണ്‍ഗ്രസ്, സി.പി.ഐ.എം എന്നീ പാര്‍ട്ടികളില്‍ നിന്നുള്ളവരാണ് ബംഗാള്‍ ഭരണകക്ഷിയില്‍ ചേര്‍ന്നത്. സൗത്ത് 24 പര്‍ഗാന ജില്ലയിലെ ഗന്ധാര്‍പൂരില്‍ 300ലധികം പേര്‍ തൃണമൂല്‍ കോണ്‍ഗ്രസില്‍ ചേര്‍ന്നു.
പിണ്ഡറായി ബ്ലോക്കില്‍ നിന്നുള്ള ബി.ജെ.പി പ്രവര്‍ത്തകര്‍ തൃണമൂല്‍ കോണ്‍ഗ്രസില്‍ ചേര്‍ന്നു. സംസ്ഥാനത്തിന്റെ മറ്റ് ഭാഗങ്ങളിലായി നടന്ന പരിപാടികളില്‍ ബി.ജെ.പി, സി.പി.ഐ.എം പാര്‍ട്ടികളില്‍ നിന്നുള്ള 350ലധികം പ്രവര്‍ത്തകര്‍ തൃണമൂലിലെത്തി. ഫോര്‍വേഡ് ബ്ലോക്ക് പശ്ചിമ മിഡ്‌നാപ്പൂര്‍ ജില്ല അധ്യക്ഷനുള്‍പ്പെടെയാണ് തൃണമൂല്‍ കോണ്‍ഗ്രസിലെത്തിയത്. ജില്ല ജനറല്‍ സെക്രട്ടറി തപന്‍ കുമാര്‍ മൈറ്റിയും പാര്‍ട്ടി വിട്ടു.
