ന്യൂഡല്‍ഹി: പ്രധാനമന്ത്രി നരേന്ദ്ര മോദിക്കെതിരെ രൂക്ഷവിമര്‍ശനവുമായി കോണ്‍ഗ്രസ് നേതാവ് രാഹുല്‍ ഗാന്ധി. രാജ്യത്ത് ഇന്ന് ജനാധിപത്യമില്ലെന്ന് പറഞ്ഞ രാഹുല്‍ പ്രധാനമന്ത്രിക്കെതിരെ രംഗത്തെത്തുന്ന ഓരോരുത്തരേയും തീവ്രവാദികളാക്കി മുദ്രകുത്തുകയാണെന്ന് രാഹുല്‍ പറഞ്ഞു. കര്‍ഷക പ്രതിഷേധവുമായി ബന്ധപ്പെട്ടായിരുന്നു രാഹുലിന്റെ വിമര്‍ശനം.
തന്റെ സുഹൃത്തുക്കള്‍ക്ക് വേണ്ടി പണം സമ്പാദിക്കുകയാണ് പ്രധാനമന്ത്രിയെന്നും അദ്ദേഹത്തിനെതിരെ നിലകൊള്ളുന്ന വരെ തീവ്രവാദിയെന്ന് വിളിക്കുമെന്നും അത് കര്‍ഷകരോ തൊഴിലാളികളോ മോഹന്‍ ഭഗവതോ ആരും ആകട്ടെയെന്നും രാഹുല്‍ പറഞ്ഞു. രാജ്യത്ത് ഇന്ന് ജനാധിപത്യമില്ലെന്നും അതുണ്ടെന്ന് നിങ്ങളില്‍ ചിലര്‍ കരുതുന്നുവെങ്കില്‍, അത് വെറും ഭാവന മാത്രമാണെന്നും രാഹുല്‍ കൂട്ടിച്ചേര്‍ത്തു.
അതേസമയം ഇന്ന് രാവിലെ രാഷ്ട്രപതി ഭവനിലേക്ക് രാഹുല്‍ ഗാന്ധിയുടെ നേതൃത്വത്തിലുള്ള കോണ്‍ഗ്രസ് മാര്‍ച്ച് പോലീസ് തടഞ്ഞിരുന്നു. തുടര്‍ന്ന് പ്രിയങ്ക ഗാന്ധി അടക്കമുള്ള നേതാക്കള്‍ കസ്റ്റഡിയിലെടുക്കുകയും ചെയ്തിരുന്നു. രാഷ്ട്രപതിയുമായുള്ള കൂടിക്കാഴ്ചയ്ക്ക് ശേഷം സംസാരിച്ച ഗാന്ധി കാര്‍ഷിക നിയമങ്ങള്‍ ദശലക്ഷക്കണക്കിന് കര്‍ഷകരുടെ ഉപജീവനമാര്‍ഗ്ഗം ഇല്ലാതാക്കുമെന്നും ഇത്തരമൊരു നിയമം ഉണ്ടാക്കിയിരിക്കുന്നത് നാലോ അഞ്ചോ ബിസിനസുകാര്‍ക്ക് വേണ്ടിയാണെന്നും പറഞ്ഞു.
ഒരു കഴിവില്ലാത്ത മനുഷ്യനാണ് പ്രധാനമന്ത്രിയെന്നും അക്കാര്യം ഈ രാജ്യത്തെ യുവാക്കളും ജനങ്ങളും അറിഞ്ഞിരിക്കണമെന്നും മുതലാളിമാരെ മാത്രം ശ്രദ്ധിക്കുന്ന, അവര്‍ പറയുന്നത് മാത്രം കേള്‍ക്കുന്ന, അവര്‍ക്ക് വേണ്ടി മാത്രം പ്രവര്‍ത്തിക്കുന്ന ഒരു പ്രധാനമന്ത്രിയാണ് അദ്ദേഹമെന്നും രാഹുല്‍ പറഞ്ഞിരുന്നു. കര്‍ഷകരും തൊഴിലാളികളും ഇപ്പോള്‍ ഒന്നിച്ചുനിന്നാണ് കേന്ദ്രത്തിനെതിരെ പോരാടുന്നത്. എന്നാല്‍ സര്‍ക്കാരിനെതിരെ ആരെങ്കിലും സംസാരിക്കുന്ന നിമിഷം, അവരെ ദേശവിരുദ്ധരും തീവ്രവാദികളും ആക്കി മുദ്രകുത്തുകയാണ്. ഇത് നിര്‍ഭാഗ്യകരമാണ്, പക്ഷേ അതാണ് ഇന്ന് സംഭവിക്കുന്നത്. ജനങ്ങളുടെ ശബ്ദങ്ങള്‍ ഞെരുക്കിക്കളയുകയാണ്, രാഹുല്‍ പറഞ്ഞു.
