തിരുവനന്തപുരം: കണ്ണൂരില്‍ ഏറ്റവും കൂടുതല്‍ രാഷ്ട്രീയ കൊലപാതകങ്ങള്‍ നടത്തിയിരിക്കുന്നത് സി.പി.എമ്മാണെന്ന വിവരാവകാശരേഖ പുറത്തുവിട്ട് മുന്‍ മുഖ്യമന്ത്രി ഉമ്മന്‍ ചാണ്ടി. ഇതേതുടര്‍ന്ന് കോണ്‍ഗ്രസിനെതിരെ സി.പി.എം നടത്തുന്ന എല്ലാ ദുഷ്പ്രചരണങ്ങളും ഉടനടി അവസാനിപ്പിക്കണമെന്നും ഉമ്മന്‍ ചാണ്ടി ആവശ്യപ്പെട്ടു. 1984 മുതല്‍ 2018 മെയ് വരെയുള്ള രാഷ്ട്രീയ കൊലപാതകങ്ങളുടെ വിവരാവകാശ രേഖയാണ് ഉമ്മന്‍ ചാണ്ടി പുറത്തുവിട്ടത്.
നാളിതുവരെ 125 രാഷ്ട്രീയകൊലപാതകങ്ങളാണ് ജില്ലയില്‍ നടന്നിട്ടുള്ളത്. ഇതില്‍ 78 ഉം സി.പി.എം ആണ് നടത്തിയിരിക്കുന്നത്. 39 കേസുകള്‍ ബി.ജെ.പിയും 7 കേസുകള്‍ മറ്റ് പാര്‍ട്ടികളുമാണ് നടത്തിയിരിക്കുന്നത്. എന്നാല്‍ കോണ്‍ഗ്രസ് ഒരേയൊരു കേസില്‍ മാത്രമാണ് പ്രതി. വിവരാവകാശ നിയമപ്രകാരം കണ്ണൂര്‍ ജില്ലാ പോലീസില്‍ നിന്നു ലഭിച്ച (No.G4-56710/2019/C 22.9.2019) കണക്കാണ് ഉമ്മന്‍ ചാണ്ടി പുറത്തുവിട്ടത്.
എന്നാല്‍ കഴിഞ്ഞ 50 വര്‍ഷമായി കണ്ണൂരില്‍ നടന്നുവരുന്ന രാഷ്ട്രീയകൊലപാതകങ്ങള്‍ക്ക് കൃത്യമായ കണക്ക് ആരുടെയും കൈയ്യിലില്ല. സി.പി.എം, ബി.ജെ.പി എന്നിവര്‍ക്ക് അവരവരുടെ കണക്കുകള്‍ കൈയ്യിലുണ്ട്. പക്ഷേ, അവ തമ്മില്‍ ഒട്ടും പൊരുത്തപ്പെടുന്നില്ല. എന്നാല്‍ ജില്ലയില്‍ ഇതുവരെ ഏതാണ്ട് 225 പേര്‍ കൊല്ലപ്പെട്ടിട്ടുണ്ടെന്നാണ് പൊതുവെയുള്ള കണക്കുകള്‍.
യു.ഡി.എഫ് സര്‍ക്കാര്‍ അധികാരത്തിലിരിക്കുമ്പോള്‍ രാഷ്ട്രീയകൊലപാതകങ്ങള്‍ കുറയുകയും ഇടതുസര്‍ക്കാര്‍ അധികാരത്തിലിരിക്കുമ്പോള്‍ അതു പതിന്മടങ്ങ് വര്‍ധിക്കുകയും ചെയ്യുന്നു എന്നും വിവരാവകാശ രേഖയില്‍ വ്യക്തമാണ്. ഇടതുസര്‍ക്കാരിന്റെ 1996-2001 കാലയളവില്‍ കണ്ണൂരില്‍ 30 പേര്‍ കൊല്ലപ്പെട്ടപ്പോള്‍ യുഡിഎഫ് സര്‍ക്കാരിന്റെ 2001-2006 കാലയളവില്‍ 10 പേരാണു കൊല്ലപ്പെട്ടത്. തുടര്‍ന്നുള്ള ഇടതുസര്‍ക്കാരിന്റെ 2006-2011 കാലയളവില്‍ 30 പേരായി വീണ്ടും കുതിച്ചുയര്‍ന്നു.
യു.ഡി.എഫ് സര്‍ക്കാരിന്റെ 2011-16ല്‍ അത് 11 ആയി കുറഞ്ഞു. പിണറായി സര്‍ക്കാരിന്റെ ആദ്യത്തെ രണ്ടു വര്‍ഷമായ 2016-2018 മെയ് വരെ 10 പേരാണ് കൊല്ലപ്പെട്ടത്. കേരളത്തില്‍ ക്രമസമാധാനം പാലിക്കാന്‍ യുഡിഎഫ് സര്‍ക്കാരിനു മാത്രമേ കഴിയൂ എന്ന് രേഖകള്‍ വ്യക്തമാക്കുന്നു. കണ്ണൂരിലും പരിസരപ്രദേശങ്ങളിലുമായി ഇപ്പോള്‍ 5 രാഷ്ട്രീയകൊലപാതകങ്ങളാണ് സി.ബി.ഐ അന്വേഷിക്കുന്നതെന്നും ഉമ്മന്‍ ചാണ്ടി ചൂണ്ടിക്കാട്ടി.
