കൊച്ചി: പി.വി അന്‍വര്‍ എം.എല്‍.എയുടെ ഭാര്യ പിതാവിന്റെ പേരില്‍ മലപ്പുറം ചീങ്കണ്ണിപ്പാലയിലുള്ള വിവാദ തടയണ 15 ദിവസത്തിനകം പൊളിച്ചു മാറ്റാന്‍ മലപ്പുറം ജില്ലാ കല്കടര്‍ക്ക് ഹൈക്കോടതിയുടെ നിര്‍ദേശം. 15 ദിവസത്തിനകം തടയണ ഉടമകള്‍ പൊളിച്ചുനീക്കിയില്ലെങ്കില്‍ ജില്ലാ കളക്ടറിന് തടയണ പൊളിക്കാമെന്ന് കോടതി അറിയിച്ചു.
നേരത്തെ ചീങ്കണ്ണി പാറയിലെ തടയണ പൊളിച്ചു നീക്കണമെന്ന് പി.വി അന്‍വറിനോട് ഹൈക്കോടതി ആവശ്യപ്പെട്ടിരുന്നു. പൊളിച്ചു നീക്കിയില്ലെങ്കില്‍ വലിയ പ്രത്യാഘാതങ്ങള്‍ നേരിടേണ്ടി വരുമെന്നും ഹൈക്കോടതി വ്യക്തമാക്കിയിരുന്നു. പി.വി അന്‍വറിന്റെ ഭാര്യാ പിതാവ് അബ്ദുള്‍ ലത്തീഫിന്റെ ഉടമസ്ഥയിലുള്ള സ്ഥലത്തെ തടയണയാണ് പൂര്‍ണമായും പൊളിച്ചു നീക്കാന്‍ കോടതി ഉത്തരവിട്ടത്.
തടയണയുടെ മുകള്‍ ഭാഗത്തെ 12 അടിയും താഴ് ഭാഗത്തെ 6 അടിയും പൊളിച്ചു നീക്കണം. നേരെത്തെ ഹര്‍ജി പരിഗണിച്ചപ്പോള്‍ തടയണ പൂര്‍ണമായി പൊളിച്ചു മാറ്റാന്‍ പ്രായോഗിക ബുദ്ധിമുട്ട് ഉണ്ടന്നും നീരൊഴുക്ക് സുഗമമാക്കി എന്നുമായിരുന്നു സ്ഥലം ഉടമ ഹൈക്കോടതിയെ അറിയിച്ചത്. തുടര്‍ന്നാണ് ജില്ലാ കളക്ടറോട് തടയണ പൊളിക്കുന്നതുമായി ബന്ധപ്പെട്ട റിപ്പോര്‍ട്ട് നല്‍കാന്‍ കോടതി നിര്‍ദ്ദേശിച്ചത്.
രണ്ടുവര്‍ഷം മുമ്പാണ് വനത്തിനുള്ളിലൂടെ ഒഴുകുന്ന അരുവി തടസ്സപ്പെടുത്തി അന്‍വര്‍ തടയണ നിര്‍മ്മിച്ചത്. ഇതിന് വനം വകുപ്പിന്റെയോ, ജലസേചന വകുപ്പിന്റെയോ അനുമതിയും ഉണ്ടായിരുന്നില്ല. തടയണ അപകട ഭീഷണി ഉണ്ടാക്കുമെന്നും കഴിഞ്ഞ മഴക്കാലത്ത് ഈ മേഖലയില്‍ നാല് ഉരുള്‍പൊട്ടലുകള്‍ ഉണ്ടായതായും വിദഗ്ധ സമിതിയും റിപ്പോര്‍ട്ട് നല്‍കിയിരുന്നു. ഹര്‍ജി രണ്ടാഴ്ചക്ക് ശേഷം കോടതി വീണ്ടും പരിഗണിക്കും.
